دقات ساعاتك ~~~~~~بقلم / رمضان العلالقة

 

أسمعي 

لدقات ساعاتك

عدي عمري 

و أحسبي 

قربي منها و اسألي 

ألفين سؤال 

من اللي حبك 

قد قلبي و قال 

البعد يكون محال

من اللي قلبه 

زي شمعة

في ليلة شتا

تدفي الحلم 

اللي نايم 

من غير غطا 

و دوب تلج الجبال 

مين اللي قال 

إن حبك آية م الجمال 

كان لمين أجمل كلام 

مين اللي فتح 

زهر قلبك قبل الربيع 

و فوق التلج 

الزهر عام 

كان لمين أجمل كلام 

قلبي زي نار 

زي ما يكون كون ركام 

و حلمي 

علي ضي شمسك 

كل ما بيصحى ينام

الوقت 

عندك ليه رخيص

وقتي اللي محسوب 

بدقة جرس 

و جرس ساعاتك

كل دقة بيتخرس 

الوقت أصبح ليه عنيد

نفسي أسمع دق ساعة 

تقول خلاص الوقت راح

وقت هجرك 

اللي شايل بين أيديه

كومة جراح 

و الساعة واقفة 

معطلة

واقفة العقارب 

جوه ساعة مكدرة 

اسألي 

عن حلمي عمري

اللي علي حافة خطر

أسألي 

ساعات القدر

أسأليها 

قولي ليها 

الوقت عندك 

كل دقة بيحتضر