يامفرقين الحظوظ...شعر احمد اسماعيل \ شاعر العرب

يامفرقين الحظوظ

يامفرقين الحظوظ حظى رايح على فين

واشكى لمين حظى والدمع على الخدين

اصرخ فى وسط الليل ولا حد سامعنى

واشوف العذاب والويل والدمعه ماترحمنى

الجسم اصبح نحيل والوحده بتألمنى

مابين بكاء وعويل والفكر يعذبنى

انا حظى مالوش مثيل دايما بيحرمنى

حتى القمر غايب والليل كأنه كابوس

والجرح مش طايب والدمع فيه محبوس

والسهم لو صايب هاكون انا المتعوس

من كتر قولت اااااه الدمعه وخدانى

والحظ فين القاه واشكى لمين تانى

نفسى ف حبيب اهواه والدنيا منعانى

اصرخ واقول الله بدد لى احزانى

شعر احمد اسماعيل \ شاعر العرب