‫#‏فهمى_على‬ *** بدون عنوان ***

بالليل و النجم المتدارى 

فى عيون القمر السهران 

بيعد سنينه المسجونة 

فى سماه ... الغارقة فى دوران 

و بيحسب .. و يعد فى سره 

كام حلم حلمهم ... ما قابلهمش 

كام جرح اتصاب بيهم قلبه 

كام مرة اتوجع ... ما اتكلمش 

و يبص على سحابة يتيمة 

بتسافر ... بس بدون عنوان 

الريح الماشية على هواها 

بتاخدها و تمشى فى اى مكان 

ما بتسألهاش ... و ما حستهاش 

و لا يوم استنت تسمعها 

و لا حست يوم ايه مشاعرها 

و لا فهمت يوم سر وجعها 

و النجم عشان مخلوق ساكت 

و مطاوع فى الكون و بيخضع 

بيطبطب صمته على سحابته 

محتاجها ... و قهرا بيودع 

يخطفها الريح ... يكبر خوفه 

يتدارى فى قمره السهران 

فيصب دموعه على حروفه

و يسافر جوا الاحزان