حب بلا ريحه ــــــــــــــــبقلمي / محمود السيد مسعودـــــــــــــــــــــــــــــــ

حب بلا ريحه

ـــــــــــــــــــــــــــــــــــــــــــــــ

كتبتك سطر في مشوار حياتي

لقيتك كلمة نشاز

كلمة مش ملضومة في خيوط الكلام

بعد سنين غربة في حياة متلطمة

سرقت من عمري أحلي ذكرياته

كاس مر علقم شربته

متغصب لجل عيون مغشوشة

لجل ضحكة مبطنة بنفاق

بعترف كنت محتاجك

بعترف عمري مالقيتك

انت في وادي 

وأحلامي المكبوتة في وادي تاني

أحلامي العطشانة للحظة صدق

أتاريني كنت متغطي بأوهام

أول ريح قابلتها عرتها 

بقيت غريق صحرا ملهاش آخر

والحب المغدور جفت أوراقه

مشافتش في يوم ربيع

خريف عمرها قصرها بدري

وكنت بكدب علي روحي

بوهمها بالحب الزايف

حب بلا ريحه

حب وخلاص

أنا باعتذر علي 

كل آهة طلعت من قلبي

كل حلم جميل خنقته بأيدي

كل عمري اللي اتسرق مني

وانا مستني يجي الحلم

خلاص المارد كسر القمقم

خلاص مابقيتش أسير

لعيون متلطخة بالكدب

ــــــــــــــــــــــــــــــــــــــــــــــــــــــــــــــــــ

بقلمي / محمود السيد مسعود ( شعر عامي ) 1/3/2016م