كرهت كلمة رحيل. الشاعر عبدالرحمن الحناوي

#من_ديوان_الحناوي

بشعر العامية المصرية

 ( #كرهت_كلمة_رحيل )

        بلسان امرأة  

كرهت كلمة رحيل .. كرهت كلمة سفر

وتعبت لما الأصيل .. ترك ديارنا وهجر 

يا حبيبي زاد البعد من همى وكسر ذاتي

وغير معاني الحب وآلمني طول حياتي

الوحده شيء صعب .. هوا انتا فاكر إيه

والغربه سايبه القلب.. حالته شكلها إيه

مراسيل كتير كتير 

وسفير ورا سفير 

والوعد كله سراب

خايفه عليك لتطير

مني وأنا بغير 

من لمة الأغراب

قلبك قسا كدا ليه والقسوه منك حجر

ولا شفنا منك غير الضنى وطول السهر 

تعالى تعالي تعالي 

كفايه علينا طلتك

تعالى تعالى تعالي 

كفايه علينا نظرتك

كفايه علينا الأماني

وريحة الورد ف سكتك

كفايه تجينا من تاني

تنور بيتنا بضحكتك

كفايه علينا التهاني

كفايه علينا بسمتك

كفايه مره لما نعاني

نلاقي روحنا ف جنتك 

آه .. آه .. وألف آه ... آه آه يا زمن

آه .. آه .. وألف آه ... آه من َحرقة الألم

حس بينا يا حبيبي .. من غيرك احنا ما نساويش

يا نور عنينا زاد لهيبي . وزيك انتا ما نلاقيش

حس بالليل الطويل  

حس بالقلب العليل

حس بالألم جوانا

لو ميلنا مره تميل

حس بالسهر اللي خلى

شكنا بيجري ورانا

حس بالشوق اللي عدى

وقرب يكسر ببيانا

حس بالألم اللي طول  

ما خلف وعده معانا

حس بالصبر اللي نول

غيرنا لكن ما روانا

 

ارجع لعشك تاني واستمتع بذكرياتك

وازرع بستان أماني وغير من عاداتك

حسسنا بالأمان من أول طلعة شمس

خلينا بس ننام من غير نفس ولا همس

****. ****. ****. ****

الله عليكي يا دنيا دا حبيبي قرب يرجع

وانا نفسي اشوف الدنيا تتباهى بينا و تسمع

تسمع كل كلمه .. تسمع كل همسه  

تسمع صوت الفرحه تسمع النغم الجميل

تطفي نار الوحده وعذاب الليل الطويل

أنا صاحيه ولا بحلم

أنا فايقه ولا حندم

صاحيه ولا نايمه كل دا ما يهمنيش

المهم أبقى عارفه إنه جاي من تاني يعيش

ويسيب بلاد الغربه ويقوللي غيرك مفيش

----------------------

بقلم د / عبد الرحمن فتحي الحناوي. 

من مصر َ