الطلبة. الشاعرة. فاطمة البلطجي

باللهجة العامّية

اللبنانية

               "الطُلبة"

يسعد مسا الطلّوا من خلف لبواب

ورحّبنا فيهم ليضلّوا 

بعد الشمس ولو نورها غاب

قالوا يلي للأرز ضِلّو 

وسحر السرو الخلّاب

وللسهل مرجوا 

وللجبل رفعة جبينو للسحاب

صار وقت نرجع 

قبل ما يشردوا بالبراري لدياب

ويسمعوا بضيعتنا 

صوت رصاص ونباح كلاب

جينا بجاها وزلم  

من خيرة الشيّاب وأحسن شباب

 نطلب بنتكن بمهر 

مُهرة ودهب و حرير عبايتها ولتياب

ونوحّد العيلتين 

ونصير أحلى صحاب

وطلبنا غالي 

بس ما منحسب للفشلة حساب

واذا بنعم اتفضلتوا علينا

منحدد موعد الخطبة وكتب لكتاب

                           👫

ما فينا يا مختار 

بعد ما دخلتوا لعتاب

نرفض شب شهم ونشامة

من خيرة الشباب

سمعته متل الليرة الدهب 

وقبضاي وما بينعاب 

بيكفي انه ابن اصل 

وعشيرة بينحسبلا حساب

وهيدي العروس بنتكن 

مربّاية والنا عليها أتعاب 

مهما الزمن عليها جار  

أو برم بيوم الدولاب

 والشب ابنا وسندنا 

عالراس منحطو وهيدا الصواب

يحرسا وتصونوا 

وعلى غيرو ما بتكشف لحجاب

سمعونا الفاتحة أم الكتاب

ولحضور العرس دعوة للأحباب

                   

               💝💐 

فاطمة البلطجي

لبنان /صيدا