بقوليك. الشاعر المبدع. محمد صالح علي حماد

$$$ بقوليك $$$$

ــــــــــــــــــــــــــــــــــــــــ

وين الريدة البديناها 

والعشرة الما كملناها 

وينو حنانك لي

وسعادتك البتمناها 

$$$$

إنتي قايلاها لحظات وعدت

ولهفة ما تم مناها

ياريتك تعرفي إنو

شوقك ونشوتو هو هواها

وإنك متنفس وولع 

وحكاية حاضرة مساها 

&&&&

ممكن ترجعي للماضي 

وكيف نحنا بديناها 

أمتن عشرة وذوق 

وسعادة مالية سماها 

العشرة ما بتهون 

والنفوس أغلاها 

كيف تعرفي الغلط 

في البني آدم شيمة وراها

يحسن من مشيتو 

ويعدل فيها خطاها

&&&&

وأهلنا قالوا العترة بتصلح البمشاها 

بس عترتنا سويتيها 

شدة تحرق الجواها

من متين أنا شلت عليك 

غير مشاعري أستناها 

تجيني راجعة حنان

وحنيتك أشيلها دواها 

$$$$

بس خيبتي الإنتظار 

ولبستيني مهانة ماها براها

معاها شتيمة وسب وكل معني للخيانة رواها 

وأنا ما كنت قايلك في موقف فقط بتهدمي البيناتنا 

كنت قايل البينا متين 

وخوة ما أنساها 

مهما يحصل يتساوى 

ونعيش برضا ونتعافى 

بس إنتي عندك كل الأمور 

تتساوى في معناها 

------------------------------

محمد صالح علي حماد 

السودان..