‫#‏فهمى_على‬ *** مش شبهى ***

 

و كون لى يا رب بعظمتك 

فى وقت الضلمة طاقة نور 

و لم الفرقة جوايا 

و ما تسيبنيش ابات مقهور 

انا فعلا ضعيف جدا 

و تايه جوا روح بتخاف 

و مهزوز م اللى ما اتشافشى 

و مش قادر على اللى اتشاف 

جميع ما انا حاسه مش شبهى 

و مش راضى يكون صاحب 

و كل الموجة ما تهدا 

احس الجذر بقى ساحب 

بحور الهم تبلعنى 

و فى الاعماق مفيش رحمة 

وجع شابك وجع تانى 

و صمت و وحدة فى الزحمة

كتير عافرت فى الدنيا 

و كنت برئ بقلب اخضر 

و ياما سألتها .. اشمعنى ؟ 

و ياما قالت لى متقدر 

و انا عارفك يا رب جميل 

و سايب الاختيار ليا 

فى لجنة كلها فاشلين 

سابولى ظلمهم فيا 

فخد ايدى و خرجنى 

من التوهة و طيش الذات 

و رجعنى برئ تانى 

و نسينى جميع ما فات 

و لو ينفع تسامحنى 

و اعيش العمر كله سكات