حلم .. وإلا كابوس بقلم : شريف بدوي
لما کنت هناك مسافر
دايما كنت باحلم إني راجع
إني راجع للسعادة
إني راجع للعيال
غيري كان يحلم بساعة
واللي كان عايز عباية
واللي كان عايز جواز
غيري بيفكر ف إني
قاعد أكبش ف الفلوس
قاعد مستمتع تملى
ومش عايز ارجع للكابوس
إني انام ف حضن ابني
عندي أغلى م الفلوس
وإن بعد إبني عني
هو ده بعينه الكابوس
غيري ما يعرفش إني
كنت كتير ببات جعان
وإني كل يوم ليلاتي
ارجع اكلم الحيطان
الفلوس مش كل حاجة
مش اللي سفرني الفلوس
عايز أكل عيش حلال
مش عايز ابني يمد
إيده للحرام
مش عايز ابني
تبقى ف نفسه أي حاجة
لو كنت الاقي نص فرصة
أعيّش إبني عيشة حلوة
كنت أبوس تحته التراب
مكنتش اتعذب ف غربة
وأرجع عشان يتاويني التراب
أو ارجع شعرى شايب
م السنين ومن العذاب
يااللي قاعد ف حضن ابنك
أنت عندك أغلى حاجة
أغلى من كل الفلوس
ضمه لابنك حضن منه
حاجه متعوضاهش فلوس
لما تنزل دمعه منه
وتقوم تجيبله حاجة حلوة
وتملي فرحة حلوة وشه
حاجة متعوضاهش فلوس
لما تبقى يوماتي راجع
ويسمعوا دق السلالم
والكل يجري بابا بابا
ويفتحوا كل الببان
تلاقي فرحة تملى قلبك
حاجة متجيبهاش فلوس
تتمنى ف شغلك كل لحظة
تعدي وتعيد الحكاية
وتطلع من تاني السلالم
وتحضن من تاني العيال
وبرغم كل حاجة حلوة
ضحيت بكل لحظة حلوة
مش مهم أخسر حياتي
مش مهم اهجربلادي
مش مهم أعيش حزين
المهم يعيش ولادي
هو ده حال المسافر
شايفينه دلوقتي
حلم وإلا كابوس .....!؟
التسميات: شعر عامى
مرسلة بواسطة فاتن حسين @ فبراير 27, 2016
<< الصفحة الرئيسية