(درس حساب )بقلم /رمضان بقشيش

قصيدة عامية بعنوان (درس حساب )

(س) بتنتمي ل (ص)
و (ص)ليست جذء من (س)
و (س) بتحتويها من سنين
رغم الغياب المر
وألم الموجوعين


لسا يا (س)؟
لسا يا (س) متعلقة بخيط عنكبوت ؟
لسا يا (س) بتصرخى جو السكوت ؟
لسا يا (س)بتزرعي عيدان الأمل
والأرض جفت
والمطر غضبان عليكى
وفى عنيكى
صداه يموت ؟

لسا يا (س) ؟
لسا البكا مشوار طويل
لسا العليل اللى انتظر
لما النظر
مبقاش يشوف
غير الدموع

لسا يا (س) ؟
طب عد يا (س) السنين
عد اللى راح فى الجرح
والجرح بتحوطه جبال الملح
والصبر كاس العطشانين

شوفى كام سنه راحوا
وكام عام فاضل لك
والبعاد زارع جراحه
فى شمسك وضلك

وانت صابره ع البعاد
عايشه مستنيه ييجي فى الميعاد
خلاص يا (س) !

(س) بتنتمي لأهل الوفاء
(س) جذء من مجموعة أبرياء
(س) بتتكون من (حاء)و (باء)
(س) معجونه بأمل ورجاء
شكرا يا (س)

بقلم /رمضان بقشيش