منتدى الشعراء والأدباء لمجلة درة الوجدان : اناديكي.. صلاح سالم عروه

قصيده(شعر العاميه)

أناديكي

أنوّر ليل لياليكي

يا عُمر العُمر ياعمري يا روح الروح

أشوف الضحكة في عينيكي بصوت مسموع

ولا تشوفي في يوم أبدًا حزين موجوع

ولا يعرف في يوم الحزن دنيتنا

ولا نعرف ألم ودموع

ولو سكتنا هاتطَوّل ولو نبدأ من الأول

هاقيد لك من صوابعي شموع

تنور لك لياليكي وتهديكي

وع الأحزان تقويكي

وأرسم للأمل سكة على الأفراح توديكي

وهافضل برضه أندهلك وأناديكي

وأفرد خطوتي ليكي

******************************

يا ست الكل يا عبلة أنا عنتر

حاربت الدنيا وبسيفي اللي متكسر

ومهما شوفت أنا عارف هاشوف أكتر

يقول لي زماني شوف غيرك ده كان أشطر

حاربت اليأس بالإيمان وبعنيكي

وهافضل برضه أندهلك وأناديكي

وأفرد خطوتي ليكي

*****************************

يا ناعسة يا شايلة جبال الصبر أنا أيوب

أم الضفاير دهب مالت عليها قلوب

ده لما ييجي الهوا ويمر بيكي يا دوب

ينهَلّ شعرك على كتفك دهب مسكوب

ماتجيبي صبرك على صبري يا ست الناس

ده الصبر يقدر يداوي معظم جروح الناس

دا إيديكي تنباس يا ست الكل وعينيكي

هاشيل القلب في كفوفي وأهاديكي

وطول العمر هاندهلك وأناديكي

وازرع جناين امل تِخَضْر حواليكي

يهون العمر علشانك ويفديكي

ويفرد خطونا ليكي

***************

كلماتي/صلاح سالم عروه

مصر

التسميات: شعر عامي

منتدى الشعراء والأدباء لمجلة درة الوجدان