خليني ساكت. صلاح سالم عروه
(شعر حلمنتيشي للترفيه فقط)
من قال إني قد عشقتُ هواكي؟!
امشي اتلهي وريني عرض قفاكي
---------
دي بلوة سودة لو في يوم نخرج سوا
ألقى عيال الحي جات زفّاكي
---------
قالوا عليكي معصعصه ومعضمه
وكأن جزار البلد شفّاكي
-----------
فاكره أما أبوكي جه وعزمنا على الغدا
وساعتها قالك اعزميه وياكي؟!
-----------
رقص الفؤاد من السرور محلقا
هنأت نفسي قلت يا بشراكي
-----------
أنا قلت طابخ بطةً أو وزةً
أو فرخةً ملفوفه الأوراكِ
----------
أو دابح الديك المشاغب عنده
عالسطح يضرب في الفراخ ويكاكي
----------
بصيت لقيت الجبنة جايه والبصل
وطبق مخلل كنت باعته معاكي
----------
يالهو بالي هو ده ينفع غدا؟!
هو البعيد ماسمعش عن كنتاكي؟!!
----------
بقلمي/ صلاح سالم عروه
التسميات: شعر عامي
مرسلة بواسطة fattenhseen@gmail.com @ فبراير 07, 2022
<< الصفحة الرئيسية