لبناني.. فاطمة البلطجي

"لبناني" 

ما تسأل كيفك 

وكيف الحال؟

أنا لبناني عريق

يا خال! 

الجواب بيغني 

عن السؤال

لا بقي 

عز ولا مال

لا فخفخة 

ولا شوفة حال

لا ميّت أنا 

ولا برقع موّال

ولا راضي 

ولا مرتاح البال

لبناني 

عاطل عن الأشغال

لا منجل عكتفي 

ولا طبّال

لا طايل حقيقة

ولا خيال

لبناني وكنت 

مضرب الأمثال

قبضاي 

ومعلّم ورجّال

صرت لقمة طرية

تحت ضرس دجّال

إنتهازي سياسي

بيلعب بالدولار

نشّف دمّي

وتاجر بهمّي

وتركني يا عمّي

ورفرف وطار

لبناني عنواني

هونيك عند الدار

الكانت عامرة

بالدبكة وبالزوار

صارت يا حسرة

موقدي وأطلال

تخمين شو صار

شو غيّر الأحوال

داب التلج فوق المرج

وانكشفت الأسرار

والملك الكان ملك

صار بيشبه الفار

لاحق الجبنة

العالقة بمصيدة

من ساقية لساقية

ومن وادي لغار

والنخلة الشامخة

هرهرت أوراق كتار

وبقي الجزع

متل العصا محتار

لا منو نوى

والنوى صار حجار

لبناني أنا

بتاخدني هاك الأفكار

عن أرزة خضرا

وبيوت أشعار

احترقت من شموع 

وصارت للندر مزار

لبنان وطني

وبلد مشاهير كتار

الحمدلله إنهم رحلوا

قبل هلنهار

لكانوا متلنا مهمّشين

وعنهم مش سامعين

لا بسوق عكاظ

ولا بالبزار

بس أنا إنسان

متل السنديان

مزروع هون 

ومش رح فل

لو راحو الكل

ولو شو ما صار

فاطمة البلطجي 

لبنان /صيدا