وصية.. الشاعر. يوسف محمود شحرور

🙏..وصية والد لولده..🙏

*قصيدة بالعامية*

يا ابني:

انا نعست وصار لازم نام

عالمخدي حطيت راسي تشوف احلام

غلبني الدهر،والعمر غفلي(ه)

وما عرفت كيف مرت الأيام

قضيّْت عمري ت أمّْن مستقبلك

كان حلمي شوفك بأعلى مقام

جار الزمان وتفرقوا الاحباب

كلمة آخ صابت قلبي بالسهام

بكرا يا ابني بيصير عندك اولاد

وبتصير تعرف الحلال من الحرام

امك ال سهرت عليك الليالي

كل ما تبرد تغطيك بالحرام

رضعت من حليبها الطاهر

من يوم ما ولدت ليوم الفطام

وبقلبها تقول:يا رب احمي ابني

تشوفو عريس ويعيش بسعادي ووئام

الدنيا يا ابني متاع الغرور

إبعد عن الشر وعن اللئام

اطلب من الله رضى والديك

ادعيلهن بالجنة

يعيشو بسلام.

"يوسف محمود شحرور.