الرزق مش بس فلوس. عبدالرحمن قريطنة

والرزق مش بس فلوس

تعرف راحة البال قول رزق

رزق الله مش بس فلوس

تصلح بين اخين من رزقك

بكلام طيب تهدى نفوس

تتعب تشقى علشان رزقك

بعد الشغل بتدي دروس

فاكر انك رازق نفسك

من عين الحساد محروس

رزقك متقدر من بدري

وانت ف بطن امك محبوس

كل المطلوب منك ترضى

كل مايجرالك مدروس

فعل الخير بادر لو تقدر

عطفك ع المحروم ملموس

تصلح بين أخين من رزقك

تفرج عن مظلوم منحوس

أجبر خاطر يوم محروم

تلقى مكانك فوق الرؤوس

عايز توصل باب الجنة

على رجل امك طاطي وبوس

واسمع كل كلامه أبوك

لإن كلامه كله دروس

كل دا كان رزق ومكتوبلك

وانت عليه غفلان ويئوس

ممكن تلقى المال بالكوم

بس عليه لعنة ومنفوس

صاحب المال باله مشغول

ليل ونهار والوجه عبوس

وتلاقي غيره مش لاقي لقمة

ولعيش حاف مش لاقي غموس

بال مرتاح ولا شاغل فكره

ليل بيعدي مافيهش فانوس

ويكون راضي وكمان عارف 

الرزق مش بس فلوس