الحلم البعيد ( وطن ضايع )..بقلم ناجى الجندى .

الحلم البعيد ( وطن ضايع )
...............
مملكش غير حجر فى إيد
ودم الوريد .. وإصرار عنيد
باجرى ورا حلمى الوحيد .. حلمى البعيد
وطن ... ضايع من زمن
عايز أرده ... وأستعيد
ضحكة عجوز م الحسرة مات
فى تراب غريب عنه إندفن
أبسط حقوقه كان كفن
وغصن زيتون
أنا إللى ماشوفتش ميلاده
ويوم ما مات
جيت للحياة بلا وطن .. وف قلبى غل
شيلت ف إيدى قوام حجر
حجر فى إيد ... وأحبى بإيد
بإصرار عنيد
باجرى ورا الحلم البعيد
وطنى ..إللى ضايع من زمن
بذنب مين ؟؟؟؟
مش ذنبى أنا .. ولا ذنبه هوّ
الذنب ذنب إللى من الأول خذل
ولا رد ساعتها بقوة
بسهولة عن داره رحل
أشرفلو كان فيها إتقتل
غيره ع الأرض إتسحل ..وم خلاهاش
ميت نعم ... لكن
تراب الأرض يُصرخ إنه عاش
العزة ليه .. والعار لكل إللى رحل
وإختار يعيش بلا وطن
وع الجدار .. علّق الذكرى الوحيدة
مفتاح لباب ..
قال يعنى فيه . ف بكرة عودة
ده عنده عقل ؟؟
كل البيبان راحوا ....
بعد ما راح الوطن
طب فين يلاقى باب لمفتاحه
ذكرى شايلها معاه ... مزوّدة جراحه
وكل مايطول الزمن
تبقى الطرق للعودة مسدودة
يا حسرته السودة
إللى م العصر إللى فات عايش
شايفنا وسط النار ... أبطال . فوَارس
أضعف ما فينا شجاع
فاتح للخطر صدره
هاين عليه عمره
فى إيده شايل حجر
بيجرى ورا حلمه
بيروى تراب الأرض من روحه
وبدمه
العزة ليه . .. والعار لكل إللى ....
بقلم
ناجى الجندى .... فى 12/12/2017

أع