قطر الغلا.. الشاعر أحمد سلاطين

قطر الغلا

*******

قطر الغلا داس الغلابة

وكأننا بنعيش ف غابة

أسود بتنهش ف النعاج

والبلوى زادت بالديابة

والقطر يفرم ف العباد

والجوع يعم مع الفساد

والغابة مليانة ب قرود

حتى البشر صبحوا جماد

قطر الغلا حطم بيوت

خلى بشر تحلم تموت

يتمنى هدمه تستره

وأما بيته مافهش قوت

مسكين وعنده م العيال

مع حمله تتهد الجبال

شغال بهمه ف شغلتين

واللحمه درب م الخيال

سكر وزيت بفلوس كتير

والعدس سعره شيء مثير

خلوا الرغيف نحلف عليه

العدل مات ومفيش ضمير

قطر الغلا ماشي وسريع 

الستر حلم وشيء فظيع

والفرخة حطوا عليها تاج

والبيض بيحلم به القطيع

ومشينا في جنازة الجنيه

وبقينا نبكي يا ناس عليه

أما الشباب نسيوا الأمل

حتى الجواز محلمش بيه

العدل مات ومفيش عمر

والحزن زاد والعيشة مر

ياقطر هدي بلاش جنان

ارجع بضهرك أنت حر

بقلم أحمد سلاطين