اللى جرى ما يتحكاش ****** محمد ضباشه

اللى جرى ما يتحكاش

محمد ضباشه

قابلتنى وشى فى وشها

دريت عيونى ماشوفتهاش

قابلتنى كتفى فى كتفها

خبطت فيها ما قصدتهاش

وسط الطريق فضلت ماشى

وعملت نفسى ماعرفتهاش

وقفت ونادت من بعيد

قلبى مشى ما إستنهاش

مشيت ورايا بعيون بتبكى

وأنا وقلبى ماتهزناش

باعت وخانت حبى ليها

وضيعت عمرى ببلاش

قلبى اللى حب قربها

أخدت حلاوته وماكفهاش

روحت أفكر من جديد

وأتمنى أنام والنوم ماجاش

ياما توهت فى دربها

أصرخ وأنادى مايهمهاش

أمسح بيدى دموع عينيها

وهي لجراحى ماتداويهاش

ياما أرتميت على كتفها

حتى بكايا ماشدهاش

لو هي نسيت غدرها

عمر الجراح ما بتتنساش

كفايه منها اللى جرى

واللى جرى مايتحكاش